11.18.2006

呆晒

有個 Personal Trainer 訓練緊個客,有以下對話:

教練:「我都好耐無交過電話費」
女客:「咁好?」
教練:「係呀,幾個月無交過喇?」
女客:「點解呀?」
教練:「唔知呀,我咁耐都唔洗交既」
女客:「係咪你阿媽幫你交左呀?」
教練:「唔係啦!D單寄去我度架嘛」
女客:「咁唔會格」
教練:「其實咁既,我用網上交錢,...」
女客:「哦?」


我心裡面一句:「小!」

10.18.2006

早晨

好耐冇去做 gym!因為工作關係,放朝早七點!一於放左工去做!講真,真係好 refreshing。以朝早七點黎講,唔算少客。一定比星巴巴多人!而且好難得係可以真真正正感受到 Gym club 既作用係用黎做 gym,而唔係做 show 又或者被迫睇人做 show!真係好舒服。好耐冇試過做 gym 做得咁舒服。

7.26.2006

咩水緊要o的?

係 gym 房裡面,你估水機、電話、定自動賣水機受歡迎 d 丫?我一定話係電話咯!每一次行過部電話,總有人會用緊、打緊、又或者準備打!成間 club 電話唔少架,俾客可以用既,三層 gym floor,每層一部。Locker room (女既唔知啦,男既)都有兩部!

心諗,係咪真係咁緊要唔打唔得先?拿,你一定有部手提係身假?唔係點知有人 call 你要覆 call?咁點解大人大姐有手提唔用,要用部有線既公眾電話呢?再講丫,你係個 gym,頂多咪兩粒鐘,唔講電話唔會死呀嘩,有急 call,都係個句:你有手提嘩?如果話想慳錢咩?咪玩啦!家下 d 免費分鐘平到你都洗唔晒啦,真係唔夠咪加多廿蚊月費咯,咁又俾多一千分鐘你喇!廿蚊個月,個 gym membership 都唔只啦下化?咪鬼咁 cheap 啦!

其實講到尾,咪又係 d 人自悲感作祟!用下公眾電話,係眾多陌生人面前扮下受歡迎大忙人,都係咁之嘛!

7.19.2006

熟客

唔知點解呢排成日見到個做電視飲食節目既主持人!佢多數去中環,因為佢個 PT 係個度。但有次我去尖咀間 club 都見到佢喎,幾撓呀!我諗我去十次 gym,至少見佢五次,真係唔好講笑!

7.17.2006

艷羨目光

今日去左銅鑼灣個 club 度做 gym,短短一個鐘,我發現原來自己都有 d 吸引力,可以有 d 艷羨目光吸到返黎!其實我去中環個 club 間唔中都會發現呢 d 艷羨目光,我諗係銅鑼灣 d 人會望得揚 d,中環 d 人會含蓄少少。不過我係 gym 房只會望機,唔多望人。又唔係要搵個 pick up 返屋企,望黎做乜?

7.10.2006

尷尬

今日突然覺得自己體力唔錯,去跑十分鐘啦!點知帶左件好易臭既衫去做 gym!頂,連我自己都唔喜陣味!又唔知點解今日好似特別受歡迎咁,d 人好鬼鍾意用我身邊個 d 機!喂,個場大把機用喎!我去拉筋啦,空地呀,坐邊都得啦!d 人又會咁岩坐我好近!喂,咁大地方,坐開 d 咪玩啦!搞到我唔敢大動作,怕臭親佢地又臭親我!唉,爆尷尬!

6.26.2006

衛生男

今日係更衣室,正要去沖涼之際,經過廁格見到一位書生型既中年男子。佢冇關廁格門,又岩岩完事,睇住佢提起腳踏上去手柄位沖廁!嘩,懶係衛生咁!跟住睇住佢走,手都冇洗!嘩,睇條友斯斯文文,真係唔知原來佢無學識兼無品架喎!

首先論品,踏手柄沖廁,非常無品啦。論學識,我諗「衛生男」唔多知道佢既私處既含菌量分分鐘多過個廁所手柄!寧願唔搵手去掂手柄都唔去洗手,唉,睇你既學識都有限!

6.07.2006

呀~ 哼~ 哦~ 呵~

唔好心邪!當你係 gym 房見到呢 d 聲係咩人叫既時候,個心唔只唔邪,直頭震添呀!D 人叫到叫春咁大聲,無非都係想引下你注意jie!我成日都話,重咪唔好做咯,舉重係 Resistant Training,要做得慢俾肌肉去習慣重量之後先再加重。要叫春咁大聱係因為肌肉唔夠力,即係未 train-up 好啦!咁做法,好易傷身!唔只傷到肌肉,係叫春既同時因為要用力去叫,會有機會搞到個喉嚨同肺內傷。咪以為咁過癮丫喇!講到尾,都係想俾人知你做得重jie!

有 d 人呢,就唔係大大隻唔夠力而叫,係想引下你望佢而叫。有次我行過部機,聽到有人好哀怨咁叫(真係似叫春呀我話你聽)!我望下條友啦,條友唔係大隻丫,又有 PT 跟住,即係唔會俾佢做得重!咁叫乜鬼野jet?仲要一路做、一路叫、一路望住人淫淫笑。哦!明晒!

6.05.2006

學好英文去做 Gym

Gym 房係一個好扮野既地方,無論係客抑或係 PT 都好鬼死鍾意講英文。我唔係唔鍾意人地講英文,難得大家肯聽政府呼籲學好英文而去多多練習,我真係開心都黎唔切啦。之但係唔好驚死人地唔知你講緊英文,講到鬼咁大聲先得假?(真係講中文又唔見佢地講得咁大聲架喎!)又唔係講得好,講咁大聲會失禮人架!不過,有好多人都好膚淺既,以為識講英文個樣會靚仔 d,又或者只係諗住媾下鬼佬咁,希望有個鬼佬搭句嗲咁就可以「飛上枝頭」!又或者純粹俾我地呢 d 本地人注意下佢既外國思維咁解。唉!講英文、學英文、練英文一 d 都唔 cheap,但係呢 d 人既背後動機 cheap!

6.03.2006

叮飯阿叔

巴士個個?Out 左啦!我講緊 Gym 房有個阿叔,逢放工時間去就見到佢!呢位阿叔好有趣,佢鐘意戲係個 Gym 房到。佢次次都有換衫架喎(總好過有 D 人成日扮晒「師兄」,又要著牛仔褲同埋皮鞋入去。好似要話俾你聽我做慣做熟,今日唔做過我會死架咁既款)。講返阿叔,佢換完衫呢,就會攔部機坐坐,十零分鐘之後會拉一兩下(我諗佢咁叫做左一 set),跟住又坐十零分鐘休息陣先至會去第二部機坐。見佢都幾忙架,要不停搵機去坐嘛。

有次我地做完 gym,都成九點幾,正諗緊去邊食飯好。H 發現佢原來係更衣室都坐得一餐,阿叔又唔換衫喎,木口木面咁坐係度!我一時口快話:「佢可能等緊叮飯掛?!」

「叮飯阿叔」因而得名。

6.01.2006

期待已久

一直以黎都好想將去做 Gym 既所見所聞寫低,同各界好友分享。但一直冇時間,有亦都冇心情去寫。咪又係因為一個字:「懶」咯!其實入親去做 Gym 都至少一粒鐘啦,點會無奇遇丫?有兩種人我係 Gym 房我一定唔會笑既:一係肥人。喂,Gym 房既作用係俾人 Get back in shape 呀,你有 Shape 大可以唔洗黎呀係咪?二係認真玩 Gym 既人。佢地唔一定玩得叻,但至少上心。但係除此之外,騎哩既人真係有好多咯!真係忍唔住要 Blog 底俾大家分享!

有咩 Feedback 都可以留 Comment 呀,但唔該大家都留個名丫,唔好留 Anonymous!好話唔好聽,你留自己做呀豬阿狗,我都唔鬼識你啦係咪?都有誠意過留 Anonymous 啦!